Aruanchal Pradesh By-poll vawiinah nei dawn

Aruanchal Pradesh by-poll election assembly constituency pahniha neih tur atana campaign hun chu Thawhlehni tlai dar 5.00 PM khan khar a ni ta a, vawiin hian heng constituency pahnihah hian inthlan hi buatsaih a ni ang.

East Kamneg district-ah leh West Siang district huam chhunga constituency-ah te inthlanna hi neih a ni dawn a ni.

Joint Chief Electoral Officer D J Bhattacharjee chuan tun ṭum inthlanah hian Electronic Voting Machine (EVM) bakah a vawikhat nan Voter-Verified Paper Audit Trail (VVPAT) system an hmang dawn tih a sawi. Inbuatsaihna pawh tluang taka neih a nih thu sawiin, polling party te pawh an polling station-ah Thawhlehni khan an kal tawh thu a sawi bawk.

Bhattacherjee chuan EVM leh VVPAT khawl te pawh polling station tinah dah an nih tawh thu a sawi a, Election Commission lam pawhin inthlan dan enfel tu tur te pawh an ruat fel tawh thu a sawi. Venhimna lam hna thawk turin state police te bakah ITBP te leh central paramilitary force company pali te dah an nih thu a sawi bawk.

Pakke-Kessang polling station-ah hian polling per­sonnel 150 dah an ni a, Likabali Constituency-ah erawh polling personnel 220 dah an nih thu a sawi.

Pakke-Kessang consti­tuency seat inchuh tur te hi deputy chief minister hlui leh congress candidate ni bawk, Kameng Dolo leh BJP no­minee BR Waghe ten an inchuh dawn a, Likabali constituency seat erawh hi chu mi pali Kardo Nyigyor (BJP), Modam Dini (Congress), Gumke Riba (Peoples Party of Arunachal) leh Independent candidate Sengo Taipodia ten an inchuh dawn thung a ni.

Pakke-Kessang-ah hian polling station 29 a awm dawn a, vote nei 7,455 a awm a ni. Likabali-ah chuan polling station 39 dah a ni dawn a, vote nei 10,608 an awm thung a ni.

Constituency pahniha vote tla te hi December 24 hian chhiar a ni dawn tih EC chuan an sawi. Likabali seat hi September 4-a health and family welfare minister Jomde Kena Guwahati-a a boral vanga ruak a ni a, Pakke-Kessang seat erawh hi chu Hauhati High Court-in Kameng Dolo thlan tlin a nih dan a pawmpui loh vanga ruak a ni thung.