Meghalaya CM in RSS hotu chhanglet

Rashtriya Swayamsevak Sangh (RSS) hotu Mohan Bhagwat-a'n Tripura a tlawh ṭuma a thusawi "India-a cheng zawng zawng chu Hindu" a tih chu Meghalaya Chief Minister Mukul Sangma chuan Thawhlehni khan na takin a chhanglet.

Mukul Sangma chuan India ram chu sakhaw zalenna ram leh mipuite thuneihna ram a nih thu sawiin, sakhaw zalenna chu ran danpuiah pawh a awm thu a sawi.

Sangma chuan RSS thil tum ber chu India ram sakhua leh chi leh chi inkara buaina hmanga ṭhendarh a ni, a ti. Tripura-a RSS hotu lu ber thusawi chuan hei hi a tichiang hle niin a sawi bawk.

Bhagwat-an India rama cheng zawng zawng Hindu an ni a ti chu pawm har a tih thu sawiin Sangma chuan, khawvel pumin India ram chu sakhaw zalenna leh mipui lalna ram a ni tih an hria a ni, a ti. Sakhaw zalenna ram a nih zia chu ram danpuiah pawh a inziak a ni, a ti bawk.

CM chuan sakhaw zalenna India ramin a neih chu RSS leh Bharata Janata Party (BJP) te vangin tihchhiat mek a nih thu a sawi a, tihchhiat zel kan phal tur a ni lo, tiin sakhaw zalen lohna rama siam chu thil hlauhawm tak a nih thu a sawi bawk a ni.