Guwahati-ah International Airport siam dawn : Assam CM

Assam Chief Minister Sarbananda Sonowal chuan Thawhlehni khan a sorkar in Guwahati Airport chu International Airport-a siam a nih theih nan hma an lak thu a sawi a, Association of South East Asian Nations (ASEAN) ram pakua te a tlawhpawh theih dawn niin a sawi bawk.

Sarbanada Sonowal chuan Bengaluru-a roadshow neihah thu sawiin, kumthar February 3-4-a Global Investors Summit (GIS) Guwahati-a neih tura investor te hip theihna turin thu a sawi a ni. Sonowal chuan Guwahati Airport chu South East Asia ram te awlsam zawka tlawhpawh an nih theihna tura International Airport-a siam a nih theih nan hma an lak thu a sawi a, airport zauh hna pawh ṭan a nih tawh thu leh, terminal thar pawh siam a nih thuai tur thu a sawi.

Regional airport development and Regional Connectivity Scheme, UDAN in a cover chin zauh tum a nih thu sawiin Sonowal chuan Guwahati chu East Asian leh ASEAN ram te cover tu tur hub atana siam tum a nih thu a sawi bawk.

ASEAN ram pakua zingah hian Bangladesh, Nepal, Bhutan leh Singapore te pawh an tel thu Sonowal chuan a sawi a, Assam sorkar leh Singapore ṭangkawpin Skill Development Centre Assam-a din an tum thu a sawi bawk a ni.