Rel kawng danin Assam rel service tibuai

Assam-a Adivasi organisation ten Thawhlehni-a Kokrajhar station, Assam-a darkar 7 zet rel kawng an dan avangin hmar­chhaka state hrang hrang leh ramchhung hmundang inkal­pawhna rel service te chu a tibuai tih official te chuan an sawi.

Northeast Frontier Railway (NFR) thupuangtu Nripen Bha­ttacharjee chuan rel 18 lai an tlan theih loh thu a sawi a, heng zingah hian Dibrugarh Town-New Delhi Rajdhani Express pawh a tel niin a sawi. Guwahati-Anand Vihar Ter­mi­nal North East Express leh Gandhidham-Guwahati Ka­makhya Express te pawh a nghawng niin a sawi bawk.

Kokrajhar station-a rel kawng block a nih avang hian Thawhlehni zing dar 6 aṭang khan rel service hi a buai hle niin Bhattacharjee chuan a sawi a ni.

Rel kawng block-tu Adivasi National Convention Committee (ANCC) te hian Scheduled Tribe status neih te, Traditional Forest dwellers Act hman te, thingpui huana thawk ten awmhmun nghet leh ram an neih ve theihte an ngiat avanga rel kawng hi dang an ni.

Lower Assam-a Chirang, Dhubri leh Bongaigaon district mipuite chu Kokrajhar rel station-ah hian pungkhawmin thu­ziakte an keng a, an thil ngiat lam hawi slogan te an auchhuah­pui thu official te chuan an sawi.