Nakkum Assembly inthlanah NPF MLA 47 te ding vek dawn

Naga Prople's Front (NPF) party chuan thu­chhuah siamin, nakkuma Assembly inthlan awm turah an MLA ṭanglai 47 te chu an din leh vek dawn thu Thawhlehni khan an tarlang. Chief Minister TR Zeliang pawh chief ministerial candidate a ni dawn tih an tichiang tawh bawk.

NPF party in an party chhung buaina an chinfel chuan rah ṭha a chhuah ṭan mek niin official te chuan an sawi a, NPF MLA 47 te hi an party presi­dent Dr Shurozelie Lietzietsu kaihhruaina hnuaiah an ding leh vek dawn tih an tichiang tawh a ni.

Nagaland Assembly term hman mek hi nakkum March 13 hian a zo tawh dawn a, mahse inthlan hun hi tun thlengin tihchian a la ni lo thung.

NPF Party hian an party chhungah buaina neuh neuh neiin July thla khan Zeliang leh MLA 36 te chuan khatih laia Chief Minister Lietzietsu kha an paihchhuak a, December 9 khan inremna thuthlung an ziak leh ta a ni.