Nagaland assembly inthlanah AAP ding dawn

Aam Aadmi Party (AAP) Nagaland Unit chuan Thawh­lehni khan thuchhuah siamin, Nagaland Legislative Assembly inthlan, 2018-ah an chuh ve dawn tih an tarlang.

AAP chuan nakkum January aṭangin candidate turte an puang chhuak dawn niin an sawi. Hotel Saramati, Demapur-a Press Conference an neihnaah thu­sawiin AAP Political Affairs Committee (PAC) member Ashutosh chuan Nagaland chu border state a nihna angin state pawimawh tak a ni a, model state a siam an tum dawn niin a sawi.

Ashutosh chuan Nagaland in politician eiru an do a hun tawh niin a sawi a, AAP chu politics vanga awm an nih loh thu leh danglamna thlen tura awm an nih zawk thu a sawi. Candidate felfai tak leh dikna duh mi tan an party-ah hmun a awm thu sawiin, party dang mi leh sa atan pawh mi rinawm an nih chuan an pawm reng thu a sawi bawk.

PAC member chuan AAP-in kawngpui ṭhat lama hmasawnna tur a ngaihtuah dawn thu leh zirna lamah pawh hmasawnna thlen a tum thu a sawi a, state chhunga medical college a din theih nana hmalak pawh an tum thu a sawi a ni.

PAC member dang, Sanjay Singh pawhin Nagaland state chhung kawngpui chhe tak chu sorkarna an chang a nih phawt chuan kum khat chhunga an siam vek tur thu a sawi a, state chu eirukna laka fihlim, corruption free state a siam an tum thu a sawi bawk.

Singh chuan Nagaland in buaina tam tak an hmachhawn mek thu sawiin, education sys­tem bikah phei chuan buaina an tawk nasa hle niin a sawi a, kawng a chhiain hriselna lamah pawh an tlahniam hle a, AAP chu thlantlin an nih phawt chuan heng zawng zawngah hian hma an lak tur thu a sawi.