AP-in infiam-naah talent nei ṭha, facility a nei ṭha lo : Khandu

Arunachal Pradesh Chief Minister Pema Khandu chuan Nilaini khan 16th Tadar Tang State Level Football Tournament final match, Rajiv Gandhi stadium Itanagar-a neih chu hmanpuiin, Transport Parliamentary Secretary Likha Saaya leh Food & Civil Supply Parliamentary Secretary Tage Taki ten an ṭawiawm a ni.

Chief Minister leh official dang ten stadium a thlen hian Arunachal Pradesh Football Association (APFA) te chuan lo hmuakin an lo lawm a ni.

He hunah hian Pema Khandu hian thu sawiin, Arunachal Pradesh chu infiamna lama talent nei ṭha tak state an nih thu a sawi a, mahse facility changtlung zawk leh ṭha an nei lo leh helam kawnga kawhhmuhtu ṭha an neih loh thu a sawi. Chief Minister chuan infiamna tihhmasawn nan state sorkar an inhuam thu a sawi a, infrastucture tihchangtlun nan hmalak an inhuam thu sawiin Rajiv Gandhi stadium tihchangtlun nan cheng vaibelchhe 15 dah a nih tur thu a sawi bawk.

Khandu chuan Arunachal-in football bika talent a neih ṭhat thu sawiin APFA hmalakna pawh a fak a, hun lo kal zel turah pawh sum leh pai hmanga support an pek tur thu a sawi a ni. Indoor stadium ṭha an neih loh chungchangah pawh sorkar laipuia Ministry of Sports chuan hmasawnna thlenna tur sum leh pai pawh pek an inhuam reng niin a sawi.

APFA hnenah hian CM hian cheng nuai 7 a pe bawk a, inkhelh zawh hian lawmman a sem nghal bawk a ni.