TPCC Member-ten Rahul Gandhi meeting neihpui

Tripura Congress Pradesh Committee (TPCC) member pathumte chuan Thawlehni zan khan All India Congress Committe (AICC) President Rahul Gandhi chu Delhi-ah meeting neihpuiin, inthlanpui lo awm tura hmalak dan tur te an sawipui.

TPCC team te hi president Birjit Sinha-a'n kaihruaiin kumthar February-a inthlan lo awm tura Congress an inpuah­chah nasat tawh thu a sawi a, karleh aṭanga election activity an ṭan tawh dawn thu sawiin can­didate pawh an tichiang tawh dawn niin a sawi a, campaign dan kalphung pawh an duang ṭan tawh niin a sawi bawk.

PRCC president bakah hian Dy. Congress legislative party leader Gopal Roy leh executive president Maharaj Pradyot Kishore Dev Barman te chu he meeting-ah hian an tel a, Rahul Gandhi ho hian sub-committee panga an din nghal bawk tih official-te chuan an sawi.

Sinha chuan party presidenrt hian inthlan lo awm tura communist party leh BJP te beih dan tur te a sawipui niin a sawi a, heng party pahnih te hi India tana hlauhawm an ni thei nia an sawi thu a sawi. Congress chuan tun hma aṭang tawhin communist leh tihluihnaa ram kaihhruai a tum ngai lo niin a sawi bawk.

TPCC President chuan AICC chief hian election committee chairman atana a ruat thu a sawi a, Gopal Roy chu co-chairman atana ruat a nih thu leh Pradyot Kishore chu convener atana ruat a nih thu a sawi.

Senior party leader Pijush Kanti Biswas chu election cam­paign committee atana ruat a ni a, media committe chu Hare Krishna Debnath-a'n a kaih­hruai dawn bawk a ni.

Sinha chuan Veteran Cong­ress leader Aman Ranjan Gupta chu election manifesto committee kaihruaitu tur a nih thu a sawi bawk.