Nagaland Congress in Kristian te beihna dem

Nagaland Pradesh Congress Committee chuan thuchhuah siamin ramchhung hmun hrang hranga Kristian awm ten beih an tawk ṭhin chu an dem thu an sawi a, Madhya Pradesh-a Krismas carol singing group man an ni chu an dem thu sawiin Indian Consti­tution bawhchhiatna a ni, an ti.

Party thuchhuah chuan Kris­tianten ramchhung hmun hrang hranga beih an tawh laia Bharata Janata Party (BJP) sorkar an ngawi tlat chu mak an tih thu an sawi bawk.

BJP in sorkarna an chan hnu lawk aṭang khan ramchhung hmun hrang hrangah sakhaw chungchanga inbeihna a awm fo niin an sawi a, uluk taka ngaihtuah chian phei sakhaw dang (Hindu ni lo) ngaitheilo, extreme taka kal te hi inthlan laia BJP sipai pawimawh tak tak te an ni tih sawiin hetianga sakhaw dangin beih an tawk chung pawha an haider lui chu thil mak a ni lo a ni, an ti. Sakhaw dang bei ṭhin tute hi Taliban leh ISIS te aia an ṭhatna bik a awm lo niin an sawi bawk.

Congress chuan ramchhung hmun hrang hranga Kristian, hlau leh thlabara awm te chu an hriatreng thu leh an khawngaih thu an sawi a, BJP sorkar malsawmna avanga Kristian tiduhdah ṭhin tute pawh an dem thu an sawi.

Party thuchhuah chuan hemi chungchangah hian sorkar laipui chu hma la vat tura an duh thu sawiin, sakhuana la vung tute lakah hian action la se an duh thu an sawi bawk. Nagaland Congress chuan ramchhunga mipuite nun leh chanvo neih humsak chu sorkar laipui tih tur a nih thu an sawi bawk a ni.