CRAM in Mapithel Dam siam duh lo

Centre for Research and Advocacy Manipur (CRAM) chuan Manipur sorkar chu Mapithel dam siam tumna chu titawp hrih turin a ngen.

CRAM chuan he dam chungchanga inhnialna leh buaina chinfel loh tam tak - forest rights palzutna te, rehabilitation leh resettlement chungchangah te, lui an khuah tur mawng lam leh hnar lama mihring nun dan a nghawng tur chungchang te leh human rights chungchang bakah Manipura sustainable development leh hmasawnna tur chungchanga buaina tam tak awm te chu chinfel a nih hma loh chuan Mapithel Dam siam tur hi kalpui zui lo turin sorkar an ngen a ni.

CRAM chuan tun dinhmunah dam siam chu chu thil tihchi a la nih loh thu sawiin Manipur sorkar in dam siamin a nghawng tur thingtlang mi, lui hnar leh lui mawng lam ami te awmdan tur a ruahmanna Rehabilitation and Resettlement (R and R) plan a la siam mumal loh avangin Maphithel dam siam tur chu la nemngheh chi a la nih loh thu an tarlang. Heng mi te hian an pi leh pute aṭanga an inrochun an ram hlu tak te, lui, ramhnuai leh an in te an chan dawn a, hemi avang hian sorkar chu R and R plan fel taka siam hmasa turin an nawr bawk.

CRAM chuan dam siam hna hi kaltlang luih pui a nih chuan human rights palzutna a ni dawn niin an sawi a, dam siamin a nghawng tur mipuite chuan harsatna tam tak an hmachhawn dawn niin an sawi a ni.

Mapithel dam hian National Green Tribunal thutlukna siam tawh angin Forest Rights Act, 2006 pawh a bawhchhia niin an sawi a, NGT court, Kolkata bench in thupek a chhuah angin state sorkar chu hma la zui turin an duh thu an sawi bawk. NGT Court hian Forest Rights (Recognition of ST and other traditional Forest Dwellers Rights) Act. 2006 -a inziak anga thil kalpui turin thu an pe niin CRAM chuan an tarlang bawk.

Mapithel Dam siamn chu la hun lo leh la ṭul loah an ngaih thu CRAM chuan an sawi a, dam siam nana thil pawimawh tak tak irrigation, power generation leh Imphal-a tui in tur supply te pawh an la hlat hle niin an sawi a ni.