AP by-election-ah vote 68.5 % a tla

Arunachal Pradesh by-election chu Ningani khan tluang taka neih a ni a, inthlan hi venhimna khauh tak hnuaia neih niin, vote 68.5 % a tlak thu official te chuan an sawi.

Arunachal by-election hi constituency pahnih - Pakke-Kessang leh Likabali-ahte neih a ni a, Pakke-Kessang bikah hian vote a tla ṭha hle a, 86% a tla phak a ni. Hetih lai hian Likabali-ah erawh 51% chauh a tla thung. Vote hi chhiar mek a la nih avang leh polling station ṭhenkhatin report an la thehluh loh avangin vote tla zat hi a la danglam thei dawna ni.

Vote thlak ni hian zing dar 7 aṭangin polling station te hawn niin, inthlanna hi tluang taka neih a ni. Likabali constituency-a polling station pakhata-ah erawh mi tu tih hriat lohten EVM an lo tihchhiat avangin vote thlak hi tihhkhawtlai a ni a, Durpai polling station-ah pawh technical lamah buaina a awm avangin vote an thlak lo bawk a ni. Joint Chief Electoral officer D J Bha­ttacharjee chuan heng booth pahnih-ah hian vote thlak ṭhat a ngai dawn niin a sawi bawk.

Venhimna hi state police-te bakah ITBP te leh central paramilitary force company li laiin khauh taka an kalpui avangin inthlanna hi boruak ralmuang tak hnuiah kalpui a ni. Pakke-Kessang-ah hian polling personnel 150 dah an ni a, Likabali-ah erawh polling personnel 220 an dah a ni. Pakke-Kessang-ah hian hian vote thlak thei 7,455 an awm a, heng zinga 3,943 hi hmeichhia an ni. Likabali-ah ve thung hi chuan vote thlak thei mi 10,608 awmin heng zinga 5,331 te hi hmeichhia an ni bawk.

Pakke-Kessang constituency seat inchuhte hi deputy chief minister hlui leh congress candi­date ni bawk, Kameng Dolo leh BJP nominee BR Waghe ten an ni a, Likabali constituency seat erawh hi chu mi pali Kardo Nyigyor (BJP), Modam Dini (Congress), Gumke Riba (Peo­ples Party of Arunachal) leh Inde­pendent candidate Sengo Taipo­dia ten an inchuh thung a ni.