Nagaland Court-in NSCN-IM hotu Muivah-a thawhpui ko

Nagaland-a Prevention of Money Laundering Act (PMLA) special court chuan Nationalist Socialist Council of Nagaland-Isak Muivah (NSCN-IM) hotu, T Muivah-a thawhpui hnai tak, Rayilung Nsarangbe alias Pela Nsa Zeme leh midang ṭhenkhat chu thu zawhfiah turin a ko.

Enforcement Directorate chuan NSCN-IM member ṭhenkhat lakah tun hnaiah charge sheet a thehlut a, an zingah hian self-styled colonel leh treasurer, Nsarangbe leh a nupui Ruth Chawang-te pawh an tel. Charge sheet hi NSCN-IM mi pawisa an dil leh chhuhsak ṭhina puh chungchangah thehlut a ni.

Dimapur-a PMLA special court chuan ED charge sheet thehluh behchhanin, Nsarangbe leh midangte hi thu zawfiah turin a ko tih ED thuchhuah chuan a tarlang.

ED chuan kum 2020, July thlaa National Investigation Agency (NIA)-in money laundering case-a Nsarangbe leh midangte laka FIR a ziahluh an zirchian hnuah charge sheet hi an siamtih a sawi. NSCN-IM hmanga mipuite sum an laksaknaah hian Nsarangbe hi Manipur-a district pali - Tamenglong, Senapati, Ukhrul leh Chandel-ahte group in-charge a ni. Nsarangbe hian a mimal pawhin sum ṭhahnem tak a lakhawm tih ED chuan a chhuichiannaah a sawi a ni. Sum an lakkhawm zinga eng emaw zat chu Nsarangbe leh a nupui Ruth Chwanag te bank account-ah dah a ni bawk.