Tripura : CPI(M) hruaituin hmeichhiate himna thlen zo loah PM Modi a puh

CPI(M) politburo member Brinda Karat-i chuan Thawhṭannia Tripura khawpui, Agartala-a rally neihah, prime minister Narendra Modi chu na taka beiin, ram chhungah hmeichhiate himna thlen zo loah a puh.

Brinda Karat chuan, India ramah nitin hmeichhia 86-te pawngsual tawk ang an nih thu leh, kum khatah thuamchhawm kaihhnawihah hmeichhia 6,000-te hal hlum an ni tih a sawi. "BJP hruaitu tam tak hmeichhe pawngsual leh kutthlaknaah an inhnamhnawiha a, mahse tumah man an awm lo," a ti.

BJP sorkarna, Tripura state-ah pawh drug mafia-te an duh angin ro an rel a, dan leh thupek mumal lo taka kalpuiin, mipuite rahbeh an ni, tiin CPI(M) hotu chuan a sawi. G20 meeting-ah PM Modi chuan India chu democracy ram ropui tak a nih thu a sawi laiin, Tripura-ah chuan inthlan ṭum li neihah voter tam tak chu vote an thlak phalsak an ni lo, tiin a sawi.

CPI(M) hruaitu chuan union home minister Amit Shah-a chu a vaupung a nat hle laiin, hmeichhiate laka pawikhawihna thlentute lakah engmah ti lohah a puh. Hmeichhiate himna tur atana Rs vbc 6000 awmna, Nirbhaya Fund siam a nih aṭanga kum 10 a tlin hnuah pawh sorar laipui chuan a fund hmun thuma ṭhena hmun khat pawh a la hmang lo a ni, a ti. PM Modi chuan rorelna dik chungchang chu sawi uar hle mah se, hmeichhiate thuam chakna tur chu a ngai pawimawh tak tak lo a, hei hi mipuite pawhin an hria a ni, a ti.

Rally hi All India Democratic Women's Association ram chhunga hmeichhiate chunga pawikawihna thleng hluar chho zel duh lohna lantirna leh, hmeichhiate dikna chanvo humhalh phutna lantira an huaihawt an ni.