Nagaland Congress-in 'Secular Front' din dawn

Nagaland Pradesh Congress Committe (NPCC) chuan an state assembly inthlan awm tur thlirin, Secular Front din a tum.

Dimapur-a Congress Bhavan-a press conference-ah puangin,NPCC president K Therie chuan 'Secular Front' din an tumna chhan ber chu BJP leh a thawhpui party-te paihthlak an ni a, state mipuite tana rorelna dik leh ṭha dinna tur a nih thu a sawi. "Sorkar thar, BJP tel lohna din turin kan bei dawn a ni," a ti.

State mipuite lungrual tak leh ngaihngam taka an awm theihna turin secular front sorkar a din ngei a ngai tih Therie chuan a sawi.

Nagaland state assembly inthlan hi nakkum kumtir lamah neih a ni ang.

"Kan bitum ber tur chu Uniform Civil Code leh Citizenship Amendment Act dodal te bakah, sakhaw tin zalenna, mipuite intluktlanna a ni," tiin Therie chuan a sawi. NPPC chu inthlan lo awm tur atan an inbuatsaih chho mek tih sawiin, Secular Front an din tur pawh intluktlanna duhtu zawng zawngte zawm turin an sawm. Lok Sabha inthlan neih hnuhnung bera Congress candidate thlawptu, Naga People's Front bakah, Bihar-a Congress nena sorkarna siam mektu,JDU-te chu inbiakna an neihpui mek thu a sawi.