Assam MP-in ramri-a buaina chhuak a tam thu a sawi

Assam-a Congress MP Gaurav Gogoi chuan Assam leh a ṭhenawm state-te inkara ramri chungchanga buaina chhuak a tam chho hle tih sawiin, pawi a tih thu a sawi.

Lok Sabha rorel inkhawmah hemi chungchang hi MP Gogoi chuan sawichhuakin, November 20-a Assam-Meghalaya ramri bula buaina chhuakah silai hmetpuah vangin mi parukin nunna an chan a ni, a ti. "Assam leh a ṭhenawm state-te inkarah ramri vanga buaina a chhuak fo a, thla rei vak lo liam taah pawh khan Assam leh Mizoram police-te pawh an lo inkap tawh a ni. Hetiang thil a thleng ṭhin hi a pawi hle a ni," a ti.

"Assam leh hmarchhak state dangte hi political group pakhat, NEDA (North-East Democratic Alliance) hnuaia mite rorelna vek a ni. Mahse hetianga buaina thleng ṭhin avang hian thawkho ni loin, ‘North East Divide Alliance' an ni tawh zawk," tiin a sawi. Union home ministry hnenah police official-te pawh kaihhruaina ṭha pe tura state sorkar tinte hriattir turin a ngen zui bawk. NEDA hi kum 2016-a BJP-in ṭangrual pawl a din a ni.