ENPO-in Nagaland inthlan an boycott tur thu sawi nawn leh

Eastern Nagaland People’s Organisation (ENPO) chuan Nagaland khawchhak lam biala state hrang, Frontier Nagaland an phutna ngaihtuahsak an nih loh chuan nakkum kumtir lama an state assembly inthlan lo awm tur chu an boycott ngei dawn tih an sawi nawn leh.

Eastern Nagaland-a tribal pawl lian ber, ENPO chuan ministry of home affairs (MHA) team-in an thil phut chungchang ngaihtuah leh, thil awmdante a hmun ngei a enfiah tura an state an tlawh hnuah emergency central executive meeting chu Tuensang-ah an nei ve nghal a ni.

ENPP president R Tsapikiu Sangtam chuan, "August 26-a state hran siam kan phutna tihhlawhtlin sak kan nih hma chuan central leh state election-ah kan tel lo ang tia resolution kan siamah khan kan la ding nghet zel a ni," a ti. Tuensang-a emergency meeting an neihah hian Eastern Nagaland huam chhungah election khap leh, nomination thehlut pawh phal loh an rel tih a sawi bawk. State hran din an phutna huam chhungah hian MLA 20 an awm a, heng MLA-te banna thehluh leh thehluh loh chuan anmahni kutah an dah tih a sawi.

MHA team-in an state an tlawh ṭum khatna an thil phut chungchang pawh ngunthluk taka an sawipui thu sawiin, Sangtam chuan Nagaland khawchhak lama district paruk - Mon, Tuensang, Kiphire, Longleng, Shamator leh Longleng chuan rawtna dang emaw, special economic package emaw engmah dawng an pawm dawn lo tih a sawi bawk.

ENPO hian kum 2020 aṭang khan Frontier Nagaland state hran siam hi an lo phut tawh a, an thil phutna kal zelah kumina Hornbill Festival pawh kha an boycott a ni.