Meghalaya leh Assam-in thawhdunna ṭha nei se Mukroh-a thil thleng kha pumpelh theih a ni ang : Meghalaya CM

Meghalaya chief minister Conrad K Sangma chuan Assam nena an inrina bul, Mukroh khuaa inkahna thleng kha Assam leh Meghalaya sorkarin thawhdunna leh inbiakpawhna ṭha zawk nei se pumpelh theih tur a ni, a ti.

November 22 khan state pahnih inrina bul, Mukroh-ah Meghalaya aṭanga Assam lama phalna nei loa thing phurhluh tum nia sawi chu Assam forest guard-ten an lo dang a, hemi hnu hian buaina a chhuak zui a ni. Assam police-te tirh an ni a, police-te silai hmehpuahah Meghalaya lam mi pangain nunna an chan a, buaina chhuakah hian Assam forest guard pakhat a thi tel bawk.

CM Sangma chuan Assam leh Meghalaya sorkar agency-te chuan thawhdunna leh inbiakpawhna ṭha nei ni se, buaina chhuak leh nunna chan an awm tur hi pumpelh theih a ni tur a ni, tiin a sawi.

Sangma chuan an state chhungah Assam lamin eng in mah an sak an remti dawn lo tih a sawi nghal bawk. Hei hi Assam forest department-in Mukroh-ah beat house an sa nia sawi chungchang a chhannaah a sawi lang a ni. Assam chief minister Himanta Biswa Sarma pawh a sawipui dawn tih a sawi bawk.

Mukroh-a buaina a chhuah hnuah, Meghalaya sorkar chuan border outpost siamna tur pawh a sanction tawh a, police platoon pawh dah an ni tawh bawk a ni.