Manipur-a zirlai phurtu bus chesualah mi 7 an thi ; Sorkarin Jan 10 thleng school excursion neih a khap

Manipur-a Thambalnu Higher Secondary School zirlai excursion-a kalte chuanna bus chu Nilaini khan chesualin zirlai pasarih an thi a, mi dang 30 chuangin hliam an tuar. He chetsualna a thlen hnu hian Manipur sorkar chuan ṭiauchhum nasat zual lai chu excursion neih rih lo tura tiin, January 10 thleng school excursion neih a khap.

Thambalnu Higher Secondary School zirlai hmeichhiate chuanna bus hi Bishnupur-Khoupum (old Cachar road)-ah a chesual a ni. Excursion neihna atan hian bus pahnih hmangin, mipa leh hmeichhaite a hran ve vein an chuang a, Noney district-a Khoupum-a annual study tour nei turin kal an tum a ni. Bus chesuala hliam tuar zinga paruk chu an dinhmun a ṭha lo hle a, ICU-ah enkawl mek an ni.

Chief minister N Biren Singh chuan bus chesuala thi chhungte chu zangnadawmna Rs nuai 5 ṭheuh pek an nih tur thu leh, hliam tuarte pawh an nat dan azirin Rs nuai 1 leh Rs 50,000 te pek an ni dawn tih a sawi. CM hian Raj Medicity-a zirlai hliam tuar enkawlte pawh a tlawh nghal bawk.

Chetsualna a thlen hnuah sorkar chuan thupek tichhuakin,state chhunga school-te chu nakkum January 10 thleng school excursion neih a khap. Director of education (S) L Nandakumar Singh chuan zirna in hrang hrang, sorkar, private leh government aided school hotute hnenah hriattirna pein, hetiang vanduaina thleng thei laka invenna atan school excursion hi bautsaih rih lo turin a ti. Sorkar thupek awih loa an kal lui a nih chuan, vanduaina a thlen palh pawhin school hotu chu mawhphurtua puh a ni ang, tiin a sawi.