Assam Assembly aṭangin Akhil Gogoi suspend

Assam independent MLA Akhil Gogoi chu Nilaini khan border area development minister Atul Bora hnena ngaihdam a dil duh loh avangin Assembly aṭangin suspend a ni a, ni hnih suspend a nihna a ni.

Nilainia Assembly session-a Question Hour hmannaah, Gogoi chuan Assam ṭhenawm state-ten an ram an luahsak nia sawi chungchanga data awm chu a rintlak tawk lo niin a sawi a, hei hi minister Bora chuan chhangin an inhnial zui a ni. Gogoi chuan information dik lo an pe niin sorkar chu a puh. An ṭhuthmun aṭangin nasa takin an inhnial zui a,Gogoi hian ṭawngkam mawi lo takin a au zui bawk. Hei vang hian rorellai lam member-te chu ding chhuakin an lungawi lohna an lantir zui a, Speaker Biswajit Daimary chuan a ṭawngkam hman avangin Gogoi chu Bora laka ngaihdam dil turin a hrilh zui a ni. Gogoi hian ngaihdam a dil duh loh avangin Speaker chuan House aṭangin a suspend a, marhshal-te a hruaichhuah tir a ni.

Rorellai MLA-te chuan Speaker hnenah Gogoi chu session pum, December 24 thleng suspend turin an ngen zui. Mahse Speaker chuan member-te pawh chuan dan an zawm lo tiin a khak zui ve leh bawk.

Thawhṭanni khan Gogoi hian Question Hour neih laia Speaker-in ṭhu tura a hriattirna a zawm duh loh avangin suspend a lo ni tawh bawk. Hemi ṭum hian hmeichhiate laka pawikhawihna thleng ṭhin chungchang sawiho a ni.