Tripura : World Heritage Site tentative list-ah Unakoti tel

Tripura-a Unakoti, Angkor Wat of the Northeast tia hriat lar chu UNESCO-in World Heritage Site-a telh tura ngaihtuah tur a chhawpchhuah, tentative list a tihchhuahah a tel.

Chief minister Manik Saha chuan World Heritage Site tentative list-a Unakoti telh a nih thu hi a Facebook-ah sawilangin, lawmawm a tih thu leh, hemi kawnga hma lakpuitu prime minister Narendra Modi leh union tourism minister G Kishan Reddy-te chunga a lawm thu a sawi.

Agartala aṭanga km 180 vela hla, Rahunandan hills-a awm, Unakoti hi kum zabi 8-9 vela tlang lian tak aṭanga sculpture siam a ni. Sorkar laipui chuan World Heritage Site-a thlan a nih ve theihna turin UNCESO-ah an thlen a, Tripura sorkar hnenah pawh khualzin tam tak hip thei tura he hmun chei ṭhatna atan hian RS vbc 12 a pe bawk.

Archaeological Survey of India(ASI)-a Conservation Assistant, Biltu Debnath chuan Unakoti hi World Heritage Site-a puan a nih chuan India rama monument humhalhna kawngah hlawhtlinna ropui tak a ni dawn bawk a ni, a ti.

UNESCO tentative list-ah hian Modhera-a Sun Temple leh Gujarat-a Vadnagar town pawh telh a ni bawk.