AP leh Assam-in ramri chungchanga inbiakna nei

Arunachal Pradesh leh Assam chuan ramri chungchanga regional committee-level inbiak thawh thumna chu Nilaini khan an nei.

Gauhati-a Arunachal Pradesh deputy chief minister Chowna Mein leh Assam agriculture minister Atul Bora-te inbiakna an neihah hian state pahnih ramri, district pathum huama an buaina neih chinfel dante an sawidun a, inbiakna hlawhtling tak an nei tih an sawi.

Chowna Mein chuan meeting neih hma hian regional committee member-te chuan AP-a Namsai leh Lohit district leh, Assam-a Tinsukia district-a border area-a chengte tlawhin, an kawm tih a sawi. Nilainia meeting report chu state pahnih chief minister ve ve hnenah pein, a ni hian sorkar laipuiah an thlen ve leh dawn a ni.

Atul Bora chuan, "State pahnih mipuite chuan inrem taka thlamuang taka awm an duh a ni. Buaina siam ṭhin hi chu misual tlemte an ni ṭhin. Chief minister Himanta Biswa Sarma chuan ṭhenawm state-te nena ramri buaina kan neihte chinfel turin hma a la a, hmasawnna tam tak kan hmu tawh a ni," a ti.