Assam Police-ten Kristian biak inte zirchiang turin hriattir: CM-in sorkar a inrawlh loh niin a sawi

Assam police-te chuan district thuneitute hnenah an huam chhunga Kristian biak-in awmte zirchiang turin an hriattir a, mahse chief minister Himanta Biswa Sarma chuan he thilah hian sorkar a inrawlh lo niin a sawi.

TV channel pakhatin a kawmnaah hemi chungchang hi sawifiahin, Chief Minister chuan hetianga police lamin hriattirna an tihchhuah hi chhui chiang turin DGP a ngen thu leh, a ṭul anga hma la zui tura a tih thu a sawi. "Assam sorkar chuan kohhran hmun pawimawh, biak-in awm zat survey neih tumna hi a nei lo," a ti.

Tun hnaiah Assam police special branch chuan district thuneitute hnenah lehkha thawnin, an huam chhunga biak-in awm zet, sakhaw inlet awm zat leh tihhluihna hmanga sakhaw inlehtirnaa inhnamhnawih an awm em tihte zirchiang turin an ti a ni.

Chief Minister chuan a insawifiahnaah, hemi chungchang hi sorkar anga ngaihtuah leh sawiho a ni lo a, hetianga lehkha pekchhuah a ni ngawt hi tihdan tur a ni lo a, Assam-a chengte chu eng hnam leh sakhua pawh inrem leh thlamuang taka an sawmho an duh ber tih a sawi. "Assam-ah biak-in eng zat nge awm tihte hi kan zawt kher tur a ni lo. Hei hian sakhaw zuitute rilru a tina thei a, hetiang thil hi kan ti tur a ni lo", tiin a sawi. Hetianga lehkha thawnchhuah a nih ngawtna chhan hi a amah ngei pawhin a chhan a zawhfiah tur thu a sawi bawk.