Assam-ah rial tla in chenna in 500 chuang tichhia

Assam-a Dibrugarh district-a hmun hrang hrangah nimin khan rial nasa takin a tla a, chenna in 500 chuang a tichhia.

District chhunga Tingkhang leh Moran revenue circle-ten rial tla hi an tuar nasa zual a, khaw 37 velah rial hi a tla niin an sawi. Moran sub-division huam chhungah chenna in 310 chhiain, Tinkhang-ah in 200 chuang a chhe bawk. Mihring thi leh hliam erawh an awm lo niin district thuneitute chuan an sawi.

Chief minister Himanta Biswa Sarma chuan rial tlain thil a tihchhiatte hi a hmunah kala enfiah turin thupek a tichhuak a, harsatna tawkte chhawmdawlna pe turin a ti bawk.

Guwahati-a Regional Meteorological Centre chuan state chhung hmun ṭhenkhatah ṭek leh rial nasa takin a thawk leh thei tih sawiin, mipuite fimkhur turin an chah. RMC hian hmarchhak bial state dangah pawh ṭek leh rial hi thawk thei reng a ni tiin, hmarchhak bial pum tan Yellow Alert a tichhuak. Chhum chhah tak tak pawh a zing dawn niin a tarlang.