Tripura : Rorellai BJP MLA 1 a bang leh

Tripura state-a rorellai, BJP MLA Dibachandra Hrangkhawl chuan nimin khan MLA a nihna aṭanga banna a thehlut a, kumina BJP kaihhruai ṭangrual sorkar thlawptu MLA bang pasarihna a ni.

Karamcherra bialtu MLA, Hrangkawl hian a ban chhanah hian a mimal thil vang niin a sawi a, assembly speaker Ratan Chakraborty a awm loh avangin secretary hnenah banna hi a thehlut.

Tripura Congress paresident hlui, Hrangkhawl hi kum 2018 assembly inthlan hma deuh khan BJP-ah a inlet a ni. Nimina banna a thehluh dawn hian kumin kumtir lama BJP MLA aṭanga banga Congress party zawmtu, Asish Kumar Saha-a'n a ṭawiawm. Hrangkhawl tel hian kumin chhungin BJP hian an MLA an chan ta a ni.

BJP thawhpui, Indigenous People's Front of Tripura (IPFT) pawhin MLA pathum an chan tawh bawk.

BJP thupuangtu Subrata Chakraborty chuan Hrangkhawl hi hun rei tak a dam ṭhat loh avangin a hna pawh a thawk mumal thei lo niin a sawi a, a ban hian assembly inthlan lo awm turah an party dinhmun pawh a nghawng dawn loh tur thu a sawi.

Seat 60 awmna, Tripura assembly-ah BJP hian MLA 34 neiin, a thawhpui IPFT hian panga a nei. Eptu lamah Congress-in MLA pakhat neiin CPI(M) in 15 a nei a, seat nga a ruak mek a ni.