Nagaland sorkarin NRHM fund a hman dan chhui chiang turin SC-in panel a din

Nagaland sorkarin National Rural Health Mission (NRHM) programme fund a hmang dik lo nia puhna chhui chiang turin, Supreme Court chuan IPS senior officer pathum awmna panel a din.

Justice Surya Kant leh JK Maheshwari awmna bench chuan panel hnenah thla ruk chhunga court-ah report rintlak tak thehlut turin a hriattir nghal bawk. Nagaland sorkar an puhna hrang hrang leh, CAG report pawh zirchiang turin a ti a ni.

Sorkar laipuiin NRHM hnuaia programme a siam kalpuina tura fund a pek chu Nagaland sorkarin dik lo takin a hmang nia sawiin social activist Rosemary Dzuvichu chuan Gauhati high court-ah petition a thehlut a, chhui chiang turin a ngen a ni. Mahse high court thutlukna siam danah a lungawi tawk loh avangin SC lamah a thlen leh a ni.

Supreme Court-ah petition a thehluhah, Dzuvichu chuan NHRM Engineering Division chuan a taka hnathawh awm si loah sum tak tam ral angin an sawi a, NRHM official-te chuan anmahni tan fund sum tam tak an hmang a ni, a ti. "Nu naupai lai, naute hnute pe lai leh naupangte hnena ṭanpuina pe loin, sorkar laipuiin sum a pekte hian anmahni puala hmangin, motor man to tak tak leina atante an hmang zawk a ni," a ti.

Hetih lai hian state advocate general chuan he puhna hi phain, a hmaa High Court-ah petition thehluh a nih ṭumin thil awmdan uluk taka chhui vek tawh a ni, a ti. Comptroller and Auditor General of India ngei pawhin state sorkar an puhna ṭhenkhat chu a lo hnawl tawh thu a sawi. Special Investigation Team pawhin uluk taka a lo chhui tawh thu a sawi bawk.