Assam-a biak-in zat chhiarpui neih tum chungchang TMC hruaituin Vatican Embassy hnenah hriattir

Assam police hotuin an state chhunga Kristian biak-in awm zat chhiarpui nei tura hriattirna a tihchhuah chungchang chu Trinamool Congress (TMC) hruaitu chuan India rama Vatican Embassy hnenah a hriattir.

TMC hruaitu Saket Gokhale chuan Vatican Embassy hnena lehkha a thawnah, Assam police hotuin hriattirna a tihchhuah hi state sorkar hriatpuinaa Kristian-te thliarhran leh tihnawmnah thlen thei a ni tiin, embassy hnenah hemi chungchang hi ngaihvena hma la turin a ngen.

He lehkhathawn hi Embassy of the Holy See of Vatican-a Apostolic Nuncio Reverend Leopoldo Girelli hnenah a thawn a ni.

Gokhale chuan Assam sorkar chuan police leh intelligence department-te hmangin state chhunga Kristiante leh an hruaitute chauh ni lo, Isua Krista zirtirnate ngaihven a, Kristian-a inleh tumte thlengin a bitum a ni, a ti.

India ram danpuia article 25 chuan mitinte chu an sakhaw zui tur leh thedarh kawngah zalenna a pe a, hei bakah hian international law leh Geneva Convention chuan mi tupawh, a mimal duhthlana sakhua a zui chu a dikna chanvo a ni tih a pawmsak bawk a ni, tiin TMC hruaitu chuan a sawi. Mahse Assam sorkar chuan police hotu thuchhuah hmang hian state chhunga Kristian leh an biak-inte chu bitumin, police leh intelligence agency-te chu Kristiante nekchepna hmanruaah a hmang a ni tiin a sawi.