Myanmar border-ah police outpost 40 siam a ni : Manipur CM

Manipur chief minister N Biren Singh chuan Myanmar ram aṭanga dan loa pem lut leh dan phal loh bungrua tawlhluh ṭhin venna turin Indo-Myanmar border hung hna thawk mek a ni tih a sawi.

Zirtawpnia Chief Minister Secretariat-a Border Roads Organisation (Project Sewak) chief engineer Col.G.Shankar nena an inkawmnaah CM chuan hei hi sawiin, state chhunga inkalpawhna ṭha siam turin roadway project hrang hrang pawh thawh a nih thu a sawi bawk. BRO hian road project eng emaw zat, a bikin border area amite an thawk a ni.

Chief Minister chuan border area-ah police outpost 40 siam mek anih thu leh, heng zinga paruk chu highway protection lam buaipui bik tur an nih thu a sawi bawk. February thlaah outpost-te hi zawhfel vek tum a ni, a ti.

India leh Myanmar inrina hi km 1,643-a thui niin, ramri hi Arunachal Pradesh (520 km), Nagaland (215 km), Manipur (398 km), leh Mizoram (510 km) an awm. Ramri hi hung mumal a la nih loh avangin dan loa paltlang pawh an awm reng ṭhin. Singh chuan an state-ah ramri hi pillarno 79 -81 inkar, km 5.6-a thui chu hung zawh a ni tawh tiha sawi a,union home ministry lamah km 60.023-a thui an hung dawn bawk a ni.