BJP-in Tripura-ah Rath Yatra nei dawn

Tripura state assembly inthlan lo awm tur atana inbuatsaihna kawng khat atan, BJP chuan January 5 hian state pumah Rath Yatra neih a tum.

BJP chuan yatra an neih tur hi Jana Vishwas Yatra tiin an vuah a, sorkar laipui leh state-a BJP kaihhruai sorkar hnathawh leh hlawhtlinna hrang hrangte pholanna hun atan an hmang dawn a ni.

Hetih lai hian Tripura-a rorellai, BJP chuan party chhunga buaina an nei mek a, an party senior MLA-te chuan Trinamool Congress an zawm a, tun hnaiah an MLA pakhat Dibachandra Hrangkhawl pawh bang lehin, BJP MLA hi pali an bang tawh. BJP kaihhruai ṭangrual sorkar chu MLA pasarihin an chhuahsan tawh a ni.

BJP Tripura president Rajeeb Bhattacharjee chuan yatra thawh khatna hi January 5-ah South Tripura leh North Tripura district-ah an kal ṭan a, yatra tawp ni tura duan January 12-ah state khawpui, Agartala-ah a intawkkhawm ang.

Yatra hi ni sarih chhung an nei dawn a,hemi chhung hian mipui a tam thei ang hnenah campaign neih an tum a ni.

Ruahmanna an siam lawk ang chuan Jan Vishwas Yatra hi union home minister Amit Shah-a'n a vailiam ang. Chhim leh hmara aṭanga kalte Agartala-a an intawhkhawmnaah pawh telpui a tum a, BJP national president JP Nadda pawhin tel a tum bawk.

Ṭhuang hniha yatra neih turah hian an kal thui zawng hi km 1,000 vel a tling dawn a, assembly constituency 60 zinga 56 an kaltlang ang. A baka constituency pali aṭanga hian yatra hi a hrana nei vein, Agartala-a intawhkhawmna hmun an rawn pan ve dawn bawk a ni.

BJP state committee chuan Jan Vishwas Yatra neih turah hian star campaigner-te anga tel turin party hruaitu10 an sawm. An zingah hian Tripura chief minister Dr Manik Saha, CM hlui Biplab Kumar Deb, Assam chief minister Himanta Biswa Sarma bakah union minister-te an tel.