Kum 2022-ah sapeltu kuta samak thi an awm lo : Assam CM

Assam chief minister Himanta Biswa Sarma chuan kum 2022 chhungin an state-a Kaziranga, Manas, Orang national park-te leh Pobitora Wildlife Sanctuary-ah samak pel an awm lo tih sawiin, thil chhinchhiah tlak a nih thu a sawi. Hei hi kum 45 dawn chhunga a thlen ṭum khatna a ni.

Samak pel report awm hnuhnung ber chu kum 2021, December 28-a Golaghat district-a Kohora hmuna thleng a ni.

Assam sorkar hian an state-in an larpui, samak ki khat neite humhalhna kawngah khauh takin hma a la a, campaign pawh neiin, sapeltute kut aṭanga an man, samak ki 2,400 zet pawh a lo halral tawh a ni. State sorkar hian samak pel ṭhin veng tur hian special anti-poaching task force pawh a din a, hetah hian senior police leh forest department official 22 an tel.

Special DGP (law and order) GP Singh chuan samak pel an nih dan data tarlangin, kum 2000-2021 chhungin sapeltuten samak 190 an tihlum a, kum 2013-2014-ah 27 ve ve tihhlum niin, kum 2020 leh 2021-ah samak pahnih ve ve tihhlum an ni bawk a ni.

Assam hi khawvela samak ki khat nei tamna ber hmun niin 2,895 an awm mek. An zinga 2,613 hi Kaziranga National Park-ah an awm a,Orang National Park-ah 125, Potibora Wildlife Sanctuary-ah 107 leh Manas National Park-ah 107 an awm. Samak ki khat neite hi Wildlife (Protection) Act, 1972-a Schedule 1 hnuaiah ramsa mang mai thei, endangered list ah dah niin, humhalh an ni.