Guwahati police-ten kum khat chhungin Ruihhlo Rs vbc 407 hu an man

Assam khawpui, Guwahati police-te chuan kum 2022 khan ruihhlo, cheng vaibelchhe 407 hu an man. Kum 2021 khan cheng vaibelchhe 548.53 hu an lo man tawh bawk.

Guwahati commissioner of police Diganta Borah chuan kum 2022-a ruihhlo an man zingah heroin Rs 95,78,40,000 man, brown sugar Rs 1,29,89,600, ganja Rs 19,76,80,150, cocaine Rs 8,20,000, morphine Rs 1,84,00,000, methamphetamine Rs 74,88,00,000, psychotropic substance tablets Rs 2,28,91,50,000, psychotropic syrup bottles Rs4,27,02,000 leh opium Rs 2,23,000 man an tel tih a sawi.

Assam sorkarin ruihhlo do beihpui a thlak aṭangin state chhung hmun hrang hrangah ruihhlo zuar leh tawlhru ṭhin eng emaw zat man an ni tawh bawk. Ruihhlo do hna an thawhnaah Criminal Investigation Department (CID) of Assam chuan Narcotics Control Bureau, New Delhi thawhpuiin training programme te an buatsaih ṭhin bawk a ni.

State mipuiten ruihhlo dona kawnga sorkar an puihna turin mobile app, 'Drugs Free Assam' tih siam a ni a, hemi hmang hian ruihhlo zuar, supply-tu leh a phurtute chu thuneitute lam hnenah hian hriattir theih a ni. Tun hnaiah Nagaon district-a Kabristan committee chuan ruihhlo dona kawng khat atan, ruihtheih thilti leh ruihhlo zuarte chu an thih pawhin a vuinaa tel ve loh an rel.