Manipur-ah kum 2022 chhungin hel 69 inpe

Manipur chief minister N Biren Singh chuan kum 2022 chhungin Manipur-ah hel 69-te chu an helna bansanin, thuneitute kutah an inpe tih a sawi.

Chief Minister chuan, "State sorkar chuan Zeliangrong United Front (ZUF) chu inkahhai puanna tur inremna a ziahpui a, hel pawl dangte pawh hetianga inremna hi ziahpui turin hma lak mek a ni," a ti.

Nikum December 27 khan sorkar laipui , Manipur sorkar leh ZUF chuan inkahhai puanna tur hi an ziak a ni.

CM Singh chuan state sorkarin ruihhlo do beihpui a thlaknaa a hlawhtlinna hrang hrangte a sawilang bawk. Mipuite nen an thawhhona ṭha tak hnuaiah ruihhlo do hna thawh pawh a hlawhtling chho zel tiin, poppy chingtute pawh an thil chinte tihtawp a, eizawnna dang an neih theihna tur ngaihtuahsak an nih thu a sawi.

Kum 2022 chhung ram acre 1,780 vela zaua poppy chin tihchhiat niin, kum hmasa aiin poppy ching pawh hi an tlahniam tawh niin CM chuan a sawi. Poppy plantation hi acre 1,118 vela zau la awmin, heng zinga acre 450 chu tihchhiat an ni leh tawh a ni, a ti. Poppy chin leh ruihhlo tawlh kaihhnawihah mi 703 man an ni a, an zingah hian khaw hotu panga an tel. Thubuai pawh 497 ziahluh a ni bawk.

Manipur sorkarin ramngaw humhalh hna a kalpuina kalzelah, Kuilong area-a khaw 21 leh Churachandpur district-a khaw 13-te chu ramngaw humhalhna kawnga an thawh ṭhat avangin Rs nuai 5 ṭheuh an ni bawk.

Zin veivak ṭhinte himna turin GPS awmna motor 24 dah a nih tih CM chuan a sawi a, Manipur Fire Service tan pawh hmanraw hrang hrang lei a ni, a ti.

Police outpost 40 siam mek a nih thu Singh chuan sawiin, heng zinga 34 chu India-Myanmar border-ah siam a ni a, highway-ah pali siam a ni bawk. Heng outpost-te hi February thlaah peihfel vek hman tum a ni a,hei hian dan kalha thiltih ṭhin venna kawngah nasa takin a pui dawn a ni tiin a sawi.