Assam-ah Covid-19 kai Mi 15 an hmuh belh leh

Assam-ah Nilaini khan Covid-19 kai hmuh belh mi 15 an awm leh a, Assam-a hri kai hmuh tawh zat hi mi 79 an tling tawh a ni. 

Health minister Himanta Biswa Sarma chuan hri kai hmuh belh an nih thu hi sawiin, Nilainia hri kai hriat tharte  hi Guwahati-a Fancy Bazaar-a a hma nia hri kai hmuh tawh nena inkungkaihna nei vek an ni tih a sawi. A hmaa inkhung hrang tura tih sa vek an nih avangin mipuite tana chiaina tur a awm loh thu a sawi bawk. Covid-19 positive tih hriat a nih hnuin heng mite hi Covid-19 hospital, MMCH ah dah luh nghal an ni. 

Minister chuan Assam-a hri kai hmuh tawh zinga 39 chu enkawl dam an ni tawh a, mi 37 te chu enkawl mek an ni tih a sawi. Hri vang hian mi pahnihin nunna an chan tawh a ni. 

Sarma chuan Fancy Bazaar-a thawkten hri an kaina hi hriat chian la ni lo mah se truck driver-te aṭanga an kai nia a lan thu leh, godown aṭangin hri a darh nia a lan thu a sawi. Hri kai hmuh belh an nih avangin Fancy Bazaar, hmarchhak biala commercial hub lian ber chu containment zone-ah puan a ni dawn. 

Tripura-ah pawh Nilaini khan Dhalai district-a Ambassa-a 86th BSF unit-a sipai pakhatin hri hi a kai tih hriat belh leh a ni bawk. 

Tripura-ah hian May 2-a BSF sipai pahnihin hri an kai tih hriat a nih hnuah an camp-ah test runpui neih nghal a ni a, hri kai nasa takin an pung chho nghal a ni. Nimin thleng khan Covid-19 kai hmuh tawh zat hi mi 156 an tling tawh. 

Hri kai zinga 63 hi Saheed Bhagat Singh Covid centre-ah enkawl mek niin, GB Pant hospital-ah 73 leh Salbangan BSF headquarters-ah pakhat enkawl an ni. Hri kai zinga a tam zawk chu an dinhmun a ngaihtuahawm lo nia sawi a ni bawk. 

Meghalaya-a Covid-19 kai pakhat pawh enkawl dam a ni tawh tih an state chief minister Conrad K Sangma chuan a sawi. 

Meghalaya-ah hian Covid-19 hi mi 13 hmuh a ni a, pakhatin a thihpui a ni. Hri kai zinga a tam ber hi enkawl dam ni tawhin, tunah hian enkawl lai pakhat a la awm.