Meghalaya : KJCLF-in Kristian-te beihna thleng an dem

Meghalaya-a Khasi Jaintia Christian Leaders Forum (KJCLF) chuan Chhattisgarh state-a Kristiante beih leh, biak-in leh kohhran hmanraw pawimawhte suasam a ni chu na taka an dem thu an sawi.

KJCLF chuan thuchhuah siamin, "Kum 2023 kumthar niah Chhattisgarh-a Narayanpur district-ah pawikhawihna hi thlengin, mi eng emaw zatin hliam an tuar a, hliam tuar zingah he biala SP in-charge pawh a tel a ni," an ti.

Sorkar laipuia minister of state for minority affairs chuan tun hnaiah Kristian leh minority leader dangte pawh meeting-te neihpuiin, central-a rorellai BJP chuan sakhaw tlem zawkte, Kristian-te pawh telin, an him tawk lo nia ngaihna leh hlauhthawnna an neih ṭhin tihbo vek an duh thute pawh a sawipui a ni, tiin KJCLF chuan a tarlang. Hetih lai mek hian Chhattisgarh-ah chuan minister thusawi letling chiahin thil a thleng a, Kristian-ten beih an tawk leh si niin an sawi.

Mahni duhthu ngeia Kristian sakhua zawmtute chunga pawl ṭhenkhet chet dan chu thuneitu lam pawhin an dodal ngei an beisei thu KJCLF chuan a sawi. Hetih laia ram chhung hmun hrang hrangah hun eng emaw chen aṭanga Kristiante beihna a thlen fo laia Prime Minister ber a ngawi tlat zet chu a langsar hle tih sawiin, hetianga a ngawih tlat hi mi ṭhenkhatin Kristian-te leh minority community dangte beihna tura chophurtuah an ngai thei a ni em? tiin an zawt.

KJCLF chuan ram chhung hmun hrang hranga rahbeh leh thlei bik tawk mek Kristiante chu an tawrhpui thu sawiin, an tan an ṭawngṭaisak reng tih an sawi.

State leh central-a rorellai sorkarte chu Kristian leh minority group dangte himna leh, an thil neihte venhimsak tura hma la turin an ngen. Inhuatna leh pawikhawihna thlentute chunga dik taka ro rel turin an phut bawk.