Guwahati-a bawlhhlawh paihna hmun park-ah siam tum

Assam sorkar chuan Guwahati-a bawhhlawh paihna hmun, Boragaon (Paschim Boragaon) dumping ground chu park-ah siam a tum.

Thawhlehnia journa­list­-te nena an inkawm­naah, GMDA minister Ashok Singhal chuan state sorkar thil tum hi sawilangin, a ṭul angin hma pawh lak chhoh ṭan a nih thu a sawi. M/S Zigma Global Environ Solutions Private Limited chu hnathawk tur hian thlan a ni a, thla 36 chhunga zo tura tih a ni.

Minister chuan bawlhhlawh hluite sawngbawlna turin wind row siam a ni tawh tih a sawi. He hmuna bawlhhlawh paihkhawm, ton nuai 15-17 inkar chu sawngbawlin thla 36 chhungin a ram hi siamṭhat a ni ang a,plastic awmte chu halral turin cement factory-te hnenah thawn a ni dawn tih a sawi.

Paschim Boragaon-a bawlhhlawh paihkhawm­na hian Guwahati-a Deeport Beel-a tui pawh a tibawlhhlawh pha a, hei bakah hian sava tam takin an tuar phah bawk nia sawi a ni.