Amit Shah-a'n Tripura Ratha Yatra vai liam

7th January, 2023

Union home minister Amit Shah chuan BJP-in Tripura assembly inthlan neih tur atana ratha yatra a buatsaih, Jan Vishwas Yatra chu Ningani khan a vai liam.

Yatra au hla atan hian “Tripuray abar BJP sarkar (BJP government in Tripura again)” tih an hmang a ni. Yatra neih hma ni hian BJP kaihhruai sorkar chuan a hnathawh hrang hrang point 84 tarlanna, 'Report Card' a lo tichhuak tawh bawk a, kum 2018 inthlan neih dawna an thil tiam zawng zawng an tihhlawhtling vek niin an sawi.

Amit Shah chuan Tripura-a BJP sorkar hnathawh hrang hrangte fakin, Left sorkarin thil a lo tihchhiat tawhte a siamṭha a, sorkar inrelbawlna ṭha tak an siam a ni, a ti. Assembly inthlan lo awm turah pawh BJP hian assembly seat awm zat hmun thuma ṭhena hmun hnih lain, sorkarna an siam leh ngei dawn tih a sawi. India ramah Congress hun a tawp tawh a, khawvelah Communist ho hun pawh a zo tawh a ni, tiin a sawi zui bawk.

State hmasawnna atana hnathawh hrang hrangte chhunzawm zel a nih theihna turin state mipuite chu BJP vote tling leh turin a sawm. Kum nga chhunga BJP kaihhruai sorkar hnathawh avangin Tripura chu hmuh theihin danglam tawh a ni, a ti.

Manipur-ah project hrang hrang hawng

Amit Shah hian Tripura aṭangin Manipur a pan leh nghal a, nimin khan project hrang hrang hawngin heng zingah hian hmarchhak biala Olympic Park hmasa ber pawh a tel. Churachandpur Medical College and Hospital pawh a hawng nghal bawk.

Olympic Park hi Sangaithel hmuna Manipur sorkar a ni a, state Olympian-te lim an dah a, he park-ah hian training centre-te pawh siam an la tum a ni.

Shah hian kum 2014 Lok Sabha inthlanpui neih tura BJP inbuatsaihna kawng khat atan tun thla chhung hian state 11 a tlawh dawn a, hmarchhak bial aṭang hian a ṭan.

Nagaland state pawh a tlawh dawn a, Nagaland aṭanga state hran, Frontier Nagaland siam phuttu, Eastern Nagaland Peoples' Organisation (ENPO) hruaitute kawmin, an thil phut chungchangte a sawipui ang. ENPO hian an thil phut hi ngaihtuahsak an nih loh chuan assembly inthlan lo awm tur pawh boycott an tum thu an lo sawi tawh.