Naga buaina chinfel a nih theihnan NPCC-in Nagaland sorkar bang turin phut

Nagaland Pradesh Congress Committee president K Therie chuan Naga political issue chinfel an duh tak tak a nih chuan, chief minister Neiphiu Rio kaihhruai United Democratic Alliance sorkar chu bang turin a phut.

Therie chuan vawiina union home minister Amit Shah-a'n an state a tlawh hunah, Naga buaina chinfel an duh takzet a nih chuan sorkar hian banna an lo thehlut tur a ni, tiin Rio-a kaihhruai sorkar hnuaiah an buaina hi chinfel a ni thei dawn lo niin a sawi.

Congress hruaitu chuan CM Rio leh NSCN(IM) general secretary Th Muivah-te chuan Naga issue chinfelna tur hi an nei lo tiin, state mipuite chuan an buaina chinfel an duh tak tak leh tak tak loh chu February-March assembly inthlan an neih hunah an duhthlanna hmangin an tihlan a ngai a ni, a ti.

NSCN (IM) nena Framework Agreement ziah a nih ṭuma prime minister Narendra Modi-a'n hun rei tak Naga buaina lo neih tawh chinfel a ni ta nia a lo sawi chu sawichhuakin,Therie chuan BJP chuan an lo intiam tawhnate chu an kengtlang zeltur a ni, a ti. Hei hi an ti thei lo a nih chuan, BJP leh a thawhpui dangte chu phatsantu leh dawtsawi hmang anga ngaih an ni ang, tiin a sawi.