Assam-Meghalaya border-ah intibuai

Assam leh Meghalaya ramri bulah Zirtawpni liam ta khan buaina a chhuak.

Assam police official sawi danin, state pahnih ramri hrul, Assam lama Kamrup district-a Boko revenue circle hnuaia Bhalukmari khuaah buaina hi a chhuak a ni. He khuaa private school pakhat-ah Ningani khan Meghalaya lam mi ṭhenkhatin meeting an nei a, he hmunah hian Assam lam mite nen hian an intibuai zui a ni.

Bhalukmari khaw hotu, Sanjit Rabha chuan Meghalaya lam mite'n meeting an buatsaih hi titawp turin an ngen a, Assam ram chhungah Meghalaya lam kaihhnawih meeting buatsaih lo turin an hrilh zui tih a sawi. Tualchhung mite chuan he school hi Meghalaya ram china awm nia chhal an tum niin an puh bawk. An meeting-na hmuna an va kal chu an lo bei zui mai niin an sawi.

Buaina a chhuak tih an hriat veleh Assam police leh district thuneitute chu an kal nghal a, pawl hnih aiawhte pawh biain, boruak pawh a ṭha zui leh nghal niin an tarlang. 

SC-in HC thupek a dansak HC-in inremna a 'stay', SC-in HC thupek a dansak.

Assam leh Meghalaya-in ramri buaina an neihna hmun ṭhenkhatah inremna, memorandum of understanding (MoU) an ziah chu Meghalaya High Court-in a 'stay' sak hnuah, Supreme Court chuan HC thupek hi a dansak ve leh.

Assam chief minister Himanta Biswa Sarma leh Meghalaya chief minister Conrad K Sangma-te chuan nikum March 29 khan state pahnihten ramri buaina an neihna, hmun 12 zinga hmun parukah inremna siamin, MoU hi an ziak a ni. Inremna an ziahna hmunah hian union home minister Amit Shah pawhin a telpui a ni.

State pahnihten inremna an siam hian Constitution-a Article 3-na a palzut nia sawiin, Meghalaya high court-ah hian mi paliin petition an thehlut a ni. Heng petition-te hi December 9, 2022 khan single judge bench chuan ngaihtuahin, state pahnihten ramria inremna an siam zulzuia ramri ṭhenna leh, boundary post siam hna thawhte chu titawp turin thupek a siam zui ta a ni. High Court-in MoU a stay sak avang hian state pahnih sorkarte hian Supreme Court-ah petition an thehlut ve leh a, hei hi Zirtawpni khan chief justice of India DY Chandrachud leh justices- PS Narasimha leh JB Pardiwala-te awmna bench chuan ngaihtuahin, HC thupek lo tihchhuah tawh chu hman loh turin a dansak ve leh a ni.