Nagaland-ah hel kaihhnawih pawikhawihna thleng 74%-in tlahniam : Amit Shah

Union home minister Amit Shah chuan Nagaland-a helna kaihhnawih pawikhawihna thleng chu kum 2014 nena khaikhinin, kum 2021-ah 74% zetin a tlahniam tawh niin a sawi.

Hemi hun chhung vek hian hel pawikhawihna thlen vanga security force mi leh sa thi zat chu 60% leh civil mi thi zat chu 84% in tlahniam bawk a ni, a ti.

Security force-te hnena thuneihna sang tak pekna, dan sakei tia sawi ṭhin, AFSPA pawh chu Nagaland aṭangin zawimuangin hlih chhoh zel a nih thu Amit Shah chuan a sawi bawk.

Amit Shah hian Zirtawpni khan Nagaland hi a tlawh a, Chumukedima-a Niathu Resort aṭangin virtual hmangin project panga a hawng a, hemi hnu hian meeting a nei zui leh a ni. Project panga a hawnte hi Rs vbc 52 hu niin, hengte hi government higher secondary leh high school 42-a laboratory sakna tur te, higher secondary school pakuaa Atal tinkering laboratory siamna tur te, Chiephobozou-a 12.5 MV sub-station siamna tur, Mt.Saramati-a trekking leh base camp siama tur leh, Wokha district-a Doyang lui chunga 2-lane RCC bridge siamna turte an ni.

Home Minister hian Nagaland-in a buaipui mek, Naga political issue leh state hran phut mek chungchangah erawh engmah a sawi lang.