Manipur-ah hel 43 inpe

Manipur-a helpawl hrang hrang aṭanga member 43-te chu sorkar kutah an inpe a, Inrinni khan hel inpete lawmna inkhawm hi Imphal-a 1st Manipur Rifles Banquet Hall-ah neih a ni.

Homecoming ceremony-ah hian chief minister N Biren Singh chu khuallian a ni. Hel inpete hian an ralthuam hrang hrangte pawh thehlut nghalin, heng zingah hian silai 19, hand grenade 17, handheld set 5, Kenwood set pakhat, IED 5, leh silai mu 209 a tel.

Chief Minister chuan helpawl hrang hrangte chu remna leh muanna a awm theihna tur leh, kawng thar an zawh theihnan inbiakna dawhkan kil turin a sawi. Hel inpete chhawmdawl zui a, an himna tur ngaihtuahin sorkarin ruahmanna a siamsak zel dawn a ni, a ti.

Hel inpe lawmna inkhawm buatsaih hma ni hian union home minister Amit Shah chuan Manipur hi a tlawh a, CM Singh kaihhruai BJP sorkar a din hnuah Manipur chu inlakhranna duhtute awm lohna hmunah siam a ni tawh tiin a sawi a ni.