EC team-in Tripura tlawh dawn

Election Commission of India (ECI) team, member 16 awmna chuan vawiin hian ni hnih cham turin Tripura an tlawh dawn.

ECI team hian assembly inthlan neihna turte an tlawh kual dawn a, Tripura bakah Meghalaya leh Nagaland pawh an tlawh dawn bawk. January 15-ah Delhi lamah an kir leh ang.

Tripura-a an cham chhungin EC team hian state guest house-ah political party zawng zawng aiawhte meeting an neihpui dawn a, hemi hnuah Ujjayanta Palace-ah press conference an nei ang.

Assembly inthlan neih tur atan Tripura-ah hian venhim hna thawk turin CAPF company 50 thawnluh an ni tawh a, company 50 dang pawh thawn leh thuai an ni ang. CAFP-te hi inthlan neih hmasaa record enin, buaina chhuah mai hlauhawm zualna hmunahte duty tir an ni dawn a ni.

Vote nei thar mi 80,000 awm
Tripura chief electoral office-in final voter list a tihchhuahah vote nei thar mi 80,000 vel an awm.

Chief electoral officer (CEO) Kiran Gitte chuan polling station zawng zawngah voter list tihchhuah a ni a, political party hrang hrang hnenah a copy pawh pek a ni tih a sawi. Summary revision neih hmaa vote nei, mi nuai 27.33 chu voter list tharah nuai 28.13-ah an pung tih a sawi.

Gitte chuan vote nei thar zingah ṭum dang aiin hmeichhia an tam tih sawiin, hmeichhiate an inziahluhna tur hian special drive pawh an neih thu a sawi bawk. Third-gender voter chu 46 aṭangin 77 ah an pun thu a tarlang bawk.

Voter list tihchhuah tharah hian Bru voter 13,500 an awm tel a ni.