Tripura: Congress-in TIPRA thawhpui turin an inhawng reng tih sawi

Tripura-a eptu party, Congress chuan state assembly inthlan lo awm turah regional party, Tipra Motha thawhpui turin an inhawng reng tih a sawi a, hemi rual hian state hran, ‘Greater Tipraland’ an phutna erawh an thlawp dawn lo tih a sawi nghal.

Tripura Pradesh Congress president Birajit Sinha chuan, 'Tipra Motha thawhpui tur hian kan inhawng reng a, mahse state hran phutna erawh kan thlawp ve lo. Tripura Tribal Areas Autonomous District Council (TTAADC) hnena thuneihna sang zawk pek erawh kan remti a ni," a ti. Tribal Council hi Indira Gandhi prime minister a nih laiin, Constitution-a sixth schedule hnuaiah siam a ni tih a sawi.

Tipra Motha hi Tripura lal thlah, Pradyot Deb Barma-a'n Congress party a chhuahsan hnuah, kum 2021 February thlaa a din a ni. Tipra Motha hian TTAADC huam chinah state hran, Greater Tipraland din an phut a, an thil phut thlawptu eng party pawh an thawhpui theih tur thu an lo sawi tawh a ni.

Sinha chuan Tipra-ten state hran an phutna chu eng political party mahin an thlawp a rin loh thu a sawi a, IPFT nena ṭangrual sorkar siam mek, BJP pawhin an thlawp lo a ni, a ti.

Tripura Congress president chuan an state-ah BJP rorelna paihthlak a nih theihna atan party dangte chu thawkho turin a sawm.

Eptu pawl, CPI(M) Tripura state secretary Jitendra Chowdhury, state Congress president Birajit Sinha leh CPI, RSP, Forward Bloc leh CPI-ML hruaitute chuan thla hmasa khan Election Commission hnenah lehkha thawnin, an state-ah assembly inthlan muanawm leh felfai tak neih a nih theihna atana a ṭul anga hma la turin an ngen a ni.

Assembly inthlan lo awm tura inbuatsaihna atan, All India Congress Committee senior leader-te chuan vawiin hian Tripura an tlawh dawn. Party hruaitu kal turte hi - AICC observer for Tripura AS Lovely, AICC general secretary Mukul Wasnik leh AICC in-charge Tripura Dr Ajoy Kumar-te an ni. Vawiina tlaiah Tripura Pradesh Congress Committee hruaitute meeting an neihpui nghal ang.