Manipur-a poppy chinna hmun tichhia

Manipur sorkarin ruihhlo do beihpui a thlakna kal zelah, Thawhṭanni khan state police kaihhruai joint team chuan Noney district-a ram acre 4-a zaua poppy chinte an tichhia.

Manipur police, Assam Rifles, SDO office leh forest department staff leh Rongmei Naga Students’ Organisation Manipur (RNSOM) aiawhte chuan additional SP (Noney) Sangboi Gangte kaihhruaiin beihpui an thlak a, T Khongmol khuaa poppy chinna hmun hi an tichhia a ni. Nungba Police Station OC, Nilamani Singh chuan T Khongmol khaw hotu leh poppy chingtu lakah hian action lak a nih tur thu a sawi a, poppy chinna hmun dangte pawh dapchhuah a, tihchhiat zel a nih tur thu a sawi bawk.

RNSOM president Daichui Gangmei chuan chief minister N Biren Singh-a'n ruihhlo do puang leh, an state pawh ruihhlo awm lohna state-a siam tura ngenna a siam mek laia, poppy chinna hmun zau tak ala awm zel chu mak a tih thu a sawi. Noney district chu poppy awm lohna hmuna siam turin sorkar an thawhpui zel tur thu a sawi.