BJP President JP Nadda-a'n Tripura tlawh dawn

BJP national president JP Nadda chuan vawiin hian BJP-in Tripura-a Jan Vishwas Yatra a neih mek kharna hun hmanpui turin a tlawh dawn.

Ni riat tawh tur Jan Vishwas Yatra hi January 5 khan union home minister Amit Shah chuan a lo hawng tawh a ni.

Chief minister Manik Saha chuan an programme siam hian mipuite thlawp a hlawh hle tih sawiin, yatra hi mi tam takin an zawm thu a sawi. Vawiin hian yatra kharna hi Umakanta-ah an nei dawn a, BJP President hian pungkhawmte hmaah thu a sawi ang. Hemi hnu hian party core committee-te meeting neihpuiin, inthlan lo awm tur atana hma lak dan turte a sawipui nghal dawn a ni.

CM chuan Yatra a tawp rualin, party hruaitute leh worker-te chu inthlan lo awm tur atan an inpeih tawh dawn tih sawiin, BJP chuan election manifesto pawh a tichhuak thuai dawn tih a sawi. Inthlan lo awm tur atan ṭangrual party an siampui mek bak party dang thawhpui tumna an neih hrih lo tih Saha chuan sawiin, BJP chuan member 60 awmna Tripura assembly-a MLA a neih mek, 36 chu inthlan lo awm turah an khum dawn tih a sawi.BJP paihthlakna tura eptu party, CPI(M) leh Congress in thawhdun an tumna chu a hlawhtling dawn lo niin a sawi bawk.