Manipur CM-in Imphal-a Kangla Nongpok Thong a hawng

Manipur chief minister N Biren Singh chuan Thawhlehni khan Imphal-a Kangla Nongpok Thong – The Eastern Gate of Kangla Fort chu mipuite tlawh theih turin a hawng.

Nongpok Thong hi Imphal Smart City Limited (ISCL) funding hnuaiah siam niin, a siam hna hi Manipur Police Housing Corporation Limited (MPHC Ltd) in a thawk a ni. A hawnna inkhawmah hian Rajya Sabha MP Maharaja Leishemba Sanajaoba, minister leh MLA-te bakah tualchhung mite eng emaw zat an tel.

Chief Minister chuan Kangla Nongpok Thong chu kar liam taa union home minister Amit Shah-a'n an state a tlawh ṭuma project 21 a hawng zinga mi a ni tih sawiin, prime minister Narendra Modi-a'n a twitter thlenga a tarlang sak tel chu lawmawm a tih thu a sawi.

Nongpok Thong hi IRB lamin an enkawl zui dawn a, Nongchup Thong (western gate) erawh chu khar a ni dawn tih CM chuan a sawi. Eastern gate lam hnaihte chu cheiṭhat an ni dawn a, a pawhtu kawngpui pawh double-lane a siam a ni thuai ang, a ti. A hun taka project zawh a nih theihna atana hma latu, engineer leh MPHC official-te chungah lawmthu a sawi bawk.

Singh chuan state mipuite inpumkhat leh lungrual taka awm turin a ngen a, a kaihhruai sorkar pawhin an state-ah boruak muanawm leh inlungrualna ṭha a awm theihna turin theihtawp a chhuah zel a ni, a ti.