Assembly inthlan hmaa Naga buaina chinfel duh

Nagaland-a tribal pawl 15-te chuan sorkar laipui hnenah state assembly inthlan hma ngeia Naga issue chu chinfel an duh tih an sawi. Sorkar laipui chuan hun tikhawtlai tawh loa mipuiten an pawm tlan theih tur inremna siam thuai turin an ngen.

Tribal pawl 15-te chuan sorkar laipui chu ṭawngkam ṭha leh thlum tak hmanga Naga mipuite bum tawh lo turin an ngen. Kum 2018 assembly inthlan hma khan Naga mipuite chuan inthlan ni loin an buaina zawk chinfel an duh thu an lo sawi tawh a, mahse rorellai BJP sorkar chuan inthlan chu buaina chinfelna atana thil pawimawh a ni tiin ṭawngkam thlum tak nen an thlem a, mahse an ṭawngkamte hi inbumna a ni, an ti.

Sorkar laipui chuan Naga political issue chu ngai thutakin, engmah chhuanlam leh tihkhawtlai awm loin a ngaihtuah a ngai tawh a, buaina hi chinfel a duh takzet a nih chuan inthlan hma ngeiin a ti tur a ni, tiin thuchhuah an siamah an sawi.