Meghalaya CM-in shared school bus 30 vai liam

Meghalaya sorkar chuan Shillong khawpui traffic tawt tihziaawmna kawng khat atan Sustainable Transport and Efficient Mobility Society (STEMS) program hnuaia shared school bus system siamin, Nilaini khan chief minister Conrad K Sangma chuan he system hnuaia bus tlantir tur 30 a vai liam.

Chief Minister chuan he system hmang hian khawpui chhunga traffic jam nasa ṭhin pawh a ziaawm chhoh a, school naupang hruaina atana private motor tlanchhuak ṭhin pawh a tlem phah a beisei thu a sawi. A bul ṭanna atan bus 30 hi tlantir phawt niin, bus dang pawh neih belh zel tum a ni, a ti.

Zirlai naupangte himna ngaih pawimawh a nih thu CM chuan sawiin, school bus-ah hian digital infrastructure, real-time bus tracking leh camera-te pawh dah ani tih a sawi bawk. Kum 5-7 hnuah bus tlantir hi a leta tihpun an tum a, Shillong khawpui bakah state chhung hmun dangah pawh share school bus hi tlantir tum a ni.

Sangma chuan sorkarin Barik leh Police Bazar inkarah skywalk siam a tum thu sawi bawkin, DPR pawh buatsaih mek a ni, a ti.

Chief Minister hian prime tourism vehicle pawh tlangzarh nghalin, hei hi tourism sector tihchangtlunna tura hmalakna a nih thu a sawi. Khualzinte tana transportation service ṭha zawk pekna tur a nih bakah, state chhunga entrepeneur-te tan pawh hna siamna tur remchang a hawnsak dawn tih a sawi bawk.