Assam : Online hmangin FIR thehlut theih dawn

Assam chief minister Himanta Biswa Sarma kaihhruaiin Nilaini khan Guwahati-a Assam Police headquarters-ah police review meeting neih a ni. Meeting-ah hian police service thuamchak leh tihchangtlun dante sawiho a ni.

Chief Minister chuan police service 20 chu tihchangtlun chhoh a ni dawn tih sawiin, reilote hnuah FIR thehlut duh tan pawh police station-a kal kher ngai loin online hmanga thehluh theihin siam a ni dawn a ni, a ti.

Hmarchhak biala khawpui lian ber, Guwahati khawpui chu pawikhawihna thlen lohna khawpuia siam tumin theihtawp an chhuah dawn tih CM chuan a sawi. Guwahati khawpuia chengte thawhpuina nen ṭan an la chho zel dawn a, khawpui chhunga sorkar leh private office, sumdawnna hmun leh thawktu panga aia tam awmna dawr bakah, private apartment hrang hrangahte closed-circuit television cameras (CCTVs) dah zel tum a ni tih a sawi.

CM chuan pawikhawihna thleng ṭhin venna atan residential apartment-ah pawh CCTV hi dah vek tura tih a ni dawn tih sawiin, CCTV vuah hma hian Assam police portal-ah register zel a ni ang, a ti. April thlaah sumdawnna hmun leh dawr, thawktu panga aia tam awmnaah CCTV hi vuah ngei ngeina tur dan thar pawh hman ṭan a ni dawn tih sawiin, Assam assembly-ah he dan hi pass thuai a ni ang, a ti.