Tripura : Zirtirtu ban takte chungchang ngaihtuahtu tur panel din

Tripura sorkar chuan zirtirtu ban tak, mi 10,323 te chungchang ngaihtuah turin, high court judge hlui kaihhruai member pathum awmna panel a din.

Tripura High Court chuan Left Front sorkar laia zirtirtu 10,323 lakte chu lak an nih danah thil dik tawk lo a awm nia sawiin, kum 2014 khan appointment hi a lo hnawlsak a ni. Left Front sorkar chuan High Court thutlukna hi Supreme Court-ah a khing let a, mahse kum 2017 khan Surpeme Court chuan High Court thupek a pawmpui a ni.

Zirtirtu ban takte hian a hna ngaia dah let leh phutin ṭum tam tak nawrh an huaihawt tawh a ni. Chief minister Manik Saha pawhin state assembly inthlan neih hma ngeiin an tan hma an lakpui ang tih a tiam a, hemi hnu hian panel hi sorkar chuan a din ta a ni.

Secondary educa­tion-a additional secretary NC Debbarma chuan, " Zirtirtu ban takte harsatna chinfelna tura hma la turin advisory committee din a ni a, committee hian May 31, 2023 aia tlai loah state sorkar hnenah rawtna an neihte an thehlut ang," a ti. Panel hi justice (retired) AB Paul-a'n a ho a, member dangte chu advocate Chandra Shekar Sinha leh IFS (retired) Prasenjit Pal an ni. Officer paliin a ṭul angin committee hi an pui bawk ang.