Meghalaya-a NPP hruaitu FW Momin a bang

Meghalaya-a rorellai, National People's Party (NPP) senior leader leh minister hlui, Frankenstein W Momin chu Nilaini khan NPP aṭanga bangin, nimin khan BJP a zawm nghal.

Momin rual hian a makpa, North Garo Hills district-a NPP general secretary Sengnab Ch Momin pawh a bang ve nghal bawk.

State assembly inthlan hmabak, Meghalaya-ah political party hruaitu zingah party danga inpe an awm chho nual tawh a ni.

Sengnab chuan NPP aṭanga a banna chhan a sawiah, NPP president leh chief minister Conrad K Sangma chuan thutlukna pawimawh siamna turah a rawn ve ngai lo tih sawiin, party tana theihtawp a lo chhuah ve ṭhinna chuan ngaih pawimawh a hlawh lo niin a sawi. NPP chhuahsan chu a tana thutlukna siam harsa tak a nih thu a sawi rualin, hma lam pan zel a ngai tih a sawi.

Momin chuan NPP a bansan chhanah hian a kum upat leh, party hnathawh dan hrang hrang leh an hotute thutlukna siam dana a lungawi tawk loh thu a sawi. Party-in thutlukna a siam danah grass root level party worker-te rawn tel an ni ngai lo a, hei hi party puitling tawhah tih dan tur a ni ngai lo, a ti.

Hetih lai hian BJP chuan a hma pawhin Momin hi an party zawm turin an lo thlem fo tawh a, BJP senior leader-te pawh a inah ṭum li zet an leng tawh nia sawi a ni.