Meghalaya : NPP-in candidate tur mi 58 hming puang

Meghalaya-a rorellai, National People's Party (NPP) chuan state assembly inthlan lo awm tura an party candidate tur, mi 58-te hming chu Ningani khan a puang.

Polo Ground, Shillong-a “Stronger Together” tih hminga election meeting neihah, party candidate turte hming hi puan a ni.
NPP hotu leh chief minister Conrad K Sangma chu a bial ngai, South Tura LAC-ah a ding leh dawn a, a unaupa leh cabinet minister ni bawk James PK Sangma chu Dadenggre LAC-ah a ding ang. Deputy chief minister Prestone Tysong chuan Pynursla (ST) LAC aṭangin inthlan hi a chuh dawn bawk.

Chief Minister chuan kum 2018 inthlan dawna an party thiltiam hrang hrangte, NPP kaihhruai sorkarin a tihhlawhtlin dante tarlanna, 'Promised Delivered' document a tlangzarh nghal bawk. CM chuan kum nga liam ta chhungin political leader eng emaw zatin an party an zawm a, an party pawh a lian chho zel tih a sawi.

Party candidate atana ruatte chu a lawmpui thu sawiin, NPP hotu chuan party dang aṭang an party zawmtute pawh politics lama hlawkna an um vang ni lo, state mipuite tana nasa zawka thawh an duh avanga zawm an nih thu a sawi a ni. Fam ta, PA Sangma hmathlir neih hrang hrangte sawiin, Sangma chuan an party chuan kum nga chhung awmze nei leh tum bulfuk tak neiin state tan an thawk a ni, a ti. Candidate ruat zingah hian political party dang aṭanga NPP zawmtu mi 10 vel an tel.

Meghalaya-a NPP sorkar chhungin, sorkar chuan ruahmanna felfai tak kalpuiin, programme hrang hrang pawh a kalpui a, hei hian state tan hmasawnna leh ṭhanlenna a siam tih CM chuan a sawi. Social sector leh infrastructure lamah pawh hmasawnna a taka hmuh tur tamtak a awm thu a sawi.